يا قمر ..

صاحبت السهر ..
ولازمني الليالي .. كأنة كان جعان لتعبي ..

فارقت السهر ..
رجعلي تاني .. عشان اتعود انه يبقى صحبي ..

قلم وورقة وغنوة شتا ..
شوية هوا بيضايق ورق الشجر ..

حاسس انك وحيد يا قمر ؟
تبديك الضلمة ويدفيك المطر ؟
وحقيقتك مجرد صخور وحفر ..

خد السهرانين ليك ونس ..
خدني انا ..

ولون الواحد في المظهر اتحبس ..
شايفك منور .. شايفك مدور ..
شايفك بعيد .. وجمالك يسهر ..

لو كان شافك بعنيك كان هيعرف ..
ان القرب منك خطر .. واكبر خطر ..

عرفت وحيد انت ليه يا قمر ؟

shaYma

فلسفة ..

انا بعجب على دماغ البني آدمين ..

فلسفة في الفكر ..
فلسفة في الحب ..
فلسفة في الدين ..

مع ان الحياة سهلة ... بحلاوتها بتتعاش ..
بمرارتها بتتعاش ..
لية ببساطة مبناخدهاش ..

نظام واحد وواحد يبقوا اتنين ..

يومك كان عامل ازاي ؟
كان زبالة .. بفكر مالحياة اقدم استقالة .
طب والي قبله ؟
كان جميل .. اه بس لو كان يبقى شوية طويل .
هتعمل ايه بكره ؟
مش عارف .. بس دايما من بكرة انا خايف .

بتمنى يجيني حب .. مع انه كيميا كدابة .
بتمنى يجيني رزق .. وبرضو هنفضل غلابة .
بتمنى لو سألت .. الاقي في ساعتها اجابة ..

ولا اقولك ..
انا لا هتمنى ولا هسأل ..
لما بكرة يبقى يجي ... هشوف هيوديني لفين .

shaYma

فيونكة حمرة ..

فاتت دقايق .. ايام وسنين ..
على فيونكة حمرة .. وجزمة وفستانين ..
احلام بسيطة وبراءة طفولة .. ماتت مع مرور الزمن بسهولة ..

فين لما كنت بحلم اني اسهر ..
منامش خالص ... او انام متأخر ..
كبرت وبقيت بتمنى انام .. فين الأحلام ؟

زمان كنا نستنى نزول المطر .. نجري ونلعب .. ونضحك مالقالب ..
دلوقتي بنقعد وحدنا في الضلمة .. بنتمنى يكون جايب معاه الحب ..
فين الراحة وفين الأمان ؟
فين الطريق ؟

ليه كبرت عقولنا وشابت القلوب ؟ .. مع ان زهرة حياتنا لسة مفتحه ..
ماتت البراءة ؟ ..
جايز عشان عيوننا هي كمان من بدري ... مفتحه .

shaYma

فنجاني ..

تعبان وفإيدي فنجاني .. برتاح من زحمة الحياة ..

تنهيدة مكتومة تغادرني ..

والاقيني بقول .. آه ..

آه منك يا دنيا لما تعاندي .. لما تدي وتدي ..

وكل الي اديتيه .. تروحي واخداه ..

ان كان عالسعي .. سعيته ..

وان كان عالحب .. اتمنيته

لكن الي انتي مش فاهماه .. اني مقدرش افضل احلم ..

هتكلم .. لازم اتكلم ..

وفلحظة افكر ..

كام مرة دار ده الحوار ؟؟!!!

ويجي ليل .. من بعده نهار .. والاقيه تاني دار !!!

هيفيدني ايه يعني الشكوى بستمرار ؟!

وأول ما اخيرا عقلي سكت ..

ابص على فنجاني ..

الاقيه برد !

shaYma

ابليس وانا ...

ابليس وانا

ابليس كان حاضر معايا من يومين ...

قالي انتي وحيدة .. قالي منتيش سعيدة ...

قالي اية المشلكة في ضحكة ولا اتنين ..

مش عايزة تنسي ؟ ... مش عايزة تعيشي ؟..

قومي بسرعة لا تفوت السنين ..

قولتلو ومين بس مش عايز .. ده البال تعبان .. والواحد حزين ..

قالي هاتي ايدك اوديكي مملكتي .. هتبقي ملكة .. بدل ما تبقي مالتعبانين ..

وقدام مملكة الغلط وقفت ثانية ابص ورايا عالندمانين ..

عالمتحسرين .. عاللي ضاعت منهم السنين ..

واتفتحت البوابة .. وشوفت الي جوا ..

لقيتهم ضايعين ..وفي الحيطان متخبطين ..

وبدل ما تكون موتة في العمر .. اختاروا موتين ..

ماتت ارواحهم ..

ماتت انسانيتهم ..

مجدوا الدوامة .. كأنهم مش في يوم فانيين ...

صرخت بكل حسي .. وقلت لا ..

ابقى انسان .. تعبان ..

ولا اني ابقى من الشياطين ..

shaYma